Onrus en geweld : 2010 : journal

• Author: Willemien Du Plessis,Nic Olivier,Juanita Pienaar
• Pages: 279-291
• DOI: 10.10520/EJC153206
• Published date: 01 January 2011
• Date: 01 January 2011

Onrus en geweld: 2010

1 Algemeen

Reeds voordat die amptelike jaarlikse statistiek bekend gemaak is, was daar groot

onduidelikheid oor hoe dit hanteer behoort te word (Steenkamp ‘Misdaadstatistieke laat

komitee kopkrap’ Die Burger (2010-05-19) 6). Verlede jaar was daar groot ontevredenheid

toe die komitee statistieke agter geslote deure bekend gemaak het en dit eers drie uur later

aan die media deurgegee het. Dié jaar se misdaadstatistieke is eers in September 2010

bekend gemaak.

Minister Joemat-Pettersson, die Minister van Landbou, Bosbou en Visserye, het

bekend gemaak dat die staat op ’n bisarre manier by misdaad baat (Essop ‘Departement

baat by stropery’ Die Burger (2010-06-02) 3). Verskillende maatskappye tender om van

gestroopte perlemoen ontslae te raak, maar die opbrengs daarvan val die Departement

toe. Die opbrengs van permitte en die verkoop van gestroopte perlemoen word in die

Mariene Lewende Hulpbronnefonds gestort. Inderdaad word die opbrengs van misdaad

dus ’n deel van die Departement se jaarlikse begroting. Die stroping van natuurlike

hulpbronne, in die besonder perlemoen, is veral in die Wes-Kaap ’n groot kopseer (vgl ook

Breytenbach ‘Duikers naby Robbeneiland in hegtenis geneem’ Die Burger (2010-11-13)

4; De Wee ‘Nege vas wat perlemoen wou stroop’ Die Burger (2010-11-10) 1).

Nadat statistieke drie jaar gelede deur die Sentrum vir Geregtigheid en Misdaad-

bekamping aangedui het dat 1,8 miljoen Suid-Afrikaanse leerders tussen graad 3 en graad

12 een of ander vorm van geweld ervaar het, is die Veilige Skoleprojek van stapel gestuur.

Hoewel daar jaarliks miljoene rande aan die projek bestee word, lyk dit nie of dit veel

vrugte afwerp nie. In die Wes-Kaap alleen was daar in die loop van 2009 194 voorvalle van

seksuele geweld, 141 van messtekery en 276 aanrandings. Geweld in woongebiede spoel

dikwels oor na die skole toe. Leerders se huislike omstandighede het ’n direkte invloed op

hul gedrag in die skool. Skole poog om ’n gebrek aan waardes aan te vul met die vak

lewensoriëntering, maar omdat dit nie ’n eksamenvak is nie, word dit nie ernstig deur

leerders opgeneem nie. Die moontlikheid om noodtoestande by disfunksionele skole af te

kondig, word ondersoek (Redakteur ‘Kultuur van skoolgeweld’ Die Burger (2010-03-03)

12). Nuwe data in die Wes-Kaap wys dat seksuele wangedrag in skole die afgelope jaar

ietwat afgeneem het (Potgieter ‘Seks-skandes by skole “al minder”’ Die Burger (2010-11-

12) 4.) In 2008 is agt gevalle aangemeld en in 2009 vyf. Die vyf leerders wat hul hieraan

skuldig gemaak is, is almal geskors. Intussen is die tug van onderwysers ’n tydsame en

duur proses. Die Wes-Kaapse Onderwysdepartement het pas hul 2009-10-jaarverslag

bekendgestel. Daarvolgens was daar tussen April 2009 en Maart 2010 274 tugverhore vir

onderwysers. Altesaam 17 onderwysers is afgedank en 120 het finale waarskuwings

gekry. Tugverhore hou onder meer verband met aanranding, seksuele teistering en gevalle

waar onderwysers hulle op ’n onbehoorlike, skandalige of onaanvaarbare wyse gedra.