Kuphela amaphupho ngesicoco seMotsepe Foundation

• Author: Sibusiso Mdlalose
• Published date: 14 May 2023
• Publication title: Isolezwe ngeSonto

Lilodwa phakathi kweCape Town Spurs, iCasric Stars nePolokwane City iqembu elizokhala lemuke nesicoco seMotsepe Foundation Championship namuhla ngo-3 ntambama, lingene lishushuluza kwiDStv Premiership

Bese kuthi amabili azibekisele indawo kumaPlay-Offs neqembu leDStv Premiership elizoqeda endaweni ka-15 kwi-log.

ISpurs izotholana phezulu ne-University of Pretoria, e-Athlone Stadium, eKapa, kuthi iCasric ibhekane ne-All Stars eTsakane Stadium, eGoli, bese kuthi iPolokwane idudulane nePretoria Callies e-Old Peter Mokaba Stadium, ePolokwane.

ISpurs ihlezi phezulu kwi-log ngamaphuzu angu-56, iCasric isendaweni yesibili ngamaphuzu angu-55, kanti iPolokwane isendaweni yesithathu ngamaphuzu angu-54.

Ngokwamaphuzu, libhekwe phakathi kweSpurs neCasric iqembu elizomuka nesicoco namuhla kodwa nePolokwane, isengawaphendula amatafula ishiye kukhalwa uma inganqoba bese iSpurs neCasric behlulwe.

Okulindeleke kwiCape Town Spurs: Leli qembu eliqeqeshwa nguShaun Bartlett, liwadinga ephelele amaphuzu amathathu emdlalweni walo wanamuhla eliwudlalela ekhaya namaTuks, nokulindeleke ukuba abalandeli balo baphume ngobuningi ukuzolikhomoza, emkhankasweni wokukhuza ibuya esigabeni sePremiership emuva kweminyaka.

Kanti nokudlala ngokulingana kusengayisebenzela i-Urban Warriors, inqobo nje uma izimbangi zayo iCasric nePolokwane, zingehluleka ukubuya namaphuzu aphelele.

Okulindeleke kwiCasric Stars: I-Casric okufanele izisole yona ngokulahla amaphuzu isiqhwakele phezulu kwi-log...