Izinhlungu eziphethuka embilaphini ziyehlukana

• Published date: 09 November 2021
• Publication title: Isolezwe

Amalungu esikhuluma ngawo kuba; izicubu eziningi ezihlukahlukene, imisipha, imithambo ehambisa igazi emzimbeni naleyo ebuyisela igazi enhliziyweni, imizwa, amathambo akheke ngokuhlukana, nontwentwesana olugubuzele izicubu. Ukuthinteka kwelungu lembilaphi kuba nomthelela komakhelwane lokhu okwenza ukuthi okuzwa emzimbeni kuphindaphindane. Ubuhlungu obujwayele ukuqubuka embilaphini nesizokhuluma ngabo namhlanje ngithanda sikuhlukanise kabili.

Okokuqala, sizokhuluma ngalobu obusuka kuyo imbilaphi budwebe sengathi ulayini obuyothi cababa endaweni yedolo engaphakathi. Lokhu kuqaqamba kwenziwa imisipha yezicubu ezinhlanu ezishiyana ngobude nokugamanxa, kukhona ezintathu ezimfishane nezimbili ezinde. Lezi ezinde ubude bazo busuka embilaphini zize ziyofika ngaphakathi nedolo. Umsebenzi walezi zicubu zihlangene zizonke ukuletha uzinzo kwesingezansi somzimba nokubuyisa imilenze okanye mangithi ukudonsela imilenze ngaphakathi. Isibonelo, ukugamanxisa umlenze komunye njengokubhala u-4. Lezi zicubu zinemisipha enamathele ezingxenyaneni ezithile zamathambo esinqe. Imbangela ejwayelekile yobuhlungu kuba ukusetshenziswa kakhulu kwalezi zicubu kanye nokunqwabelana kwamakhemikhali engiyaye ngiwabize ngama phara. Sasichazile kwenye ingosi ukuthi amaphara akhiqizwa yizinsalela zezinkinga ezihlukahlukene ezenzeka emizimbeni yethu kuphinde kube ngukudla okuphehlaphehliwe esithanda ukukudla okunjengopholoni, ama-burger, amaviyena, ama-pizza, nokunye okuningi; singayikhohlwa inyama ebomvu ikakhulu eyosiwe. Lama khemikhali ahamba ehlala nje egxumeka amatende yonke indawo. Ukunqwabelana kwawo kudala izifo eziningi emzimbeni kuhlanganisa izinhlungu ezishiyanayo, imidlavuza, nokunye okuningi kuye ngokuthi amaphara anqwabelane kuphi nendawo futhi uyini umsebenzi waleyo ndawo.

Ezinye izinhlungu esizokhuluma ngazo yilezi eziqubuka engxenyaneni yethambo elide elenza ithanga. Le ngxenyana iyiqhutshana elingaphakathi bude buduze nembilaphi ibizwa ngokuthi yi-trochanter. Lezi zinhlotshana zamathambo zihlukene kabili kukhona engaphandle kwethambo elikhulu okuyiyona enkulu bese kuba yilena engaphakathi kwethambo okuyiyona encanyana. Kunemisipha yezicubu enamathela kuleli qhutshana lethambo elide lethanga. Lezi zicubu zinamathelene zalandelana ohlangothini zaqamelisa izinso kuzo. Izinhlungu eziqubuka kuleli qhutshana lethambo ziyamangalisa ngokuqaqamba. Zihlala emlenzeni kube nzima ukunyakaza, izinhlungu kuba sengathi zenyuka nembilaphi ziye ngasethanjeni lesinqe phezu kwembilaphi. Kwabaningi...